2022-mi innuttaasut ilinniagaqarnerisa nalunaarsuutaat

Saqqummersitami uani innuttaasut ilinniagaqarnerisa kisitsisitigut paasissutissaat atorlugit innuttaasut ilinniarsimanerisa qaffasissusaat ilinniarnerisalu isikkuat takuneqarsinnaapput.

 

Innuttaasut ilinniarsimanerisa allanngornerisa taamaallaat piginnaasaqalersitsisumik ilinniagaqarsimanersut ersersinngilaat Kalaallit Nunaannut nuuttartut aamma Kalaallit Nunaannit nuuttartut ilinniarsimasaasa qaffasissusaat aamma sunnertarpaat. Innuttaasut ilinniarsimanerisa qaffasissusaat aamma inuit toqusut ilinniagarisimasaanit sunnerneqartarput.

 

Ilinniakkat qaffasissusiisa nalunaarsuutaat nalinginnaasumik innuttaasuni inuusunnerusuni matussusiinerusarput. Taamaattumik ilinniakkat qaffasissusaanni qaffariaatip ilaa ilinniakkat naammassineqartut annertuumik matussusiinerulernerannik peqquteqarsinnaavoq (saqqummersitami periaatsimut nassuiaat takuuk).

 

Meeqqat atuarfianit qaffasinnerusunik ilinniagaqarsimaneq

2022-mi innuttaasut 16-it 74-illu akornanni ukiullit 41 pct.-ii meeqqat atuarfiannit qaffasinnerusumik ilinniagaqarsimapput, ukiut qulit ingerlanerini 6 procentpoint-imik qaffallutik.

 

Taakkunannga 13 pct.-ii ingerlariaqqiffiusumik ilinniakkamik naammassinnissimapput, 28 pct.-iilu ilinniarnertuutut, inuussutissarsiummik ilinniakkamik imaluunniit angusanik qaffassaanermik ilinniagaqarsimallutik. Ukiullu qulit ingerlanerini 2 procentpoint-inik aamma 4 procentpoint-inik qaffariarsimapput.

 

Titartagaq 1. 2011-miit 2022-mut innuttaasut qaffasinnerpaamik ilinniarsimasaat

Nassuiaat: Ilinniarnertuunngorniarluni inuussutissarsiornermilu ilinniarnerni aamma qaffassarluni ilinniarnerit ilaapput.

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROG).

 

Inunngorfik malillugu meeqqat atuarfiannik naammassinnissimaneq

2022-mi innutaasut Kalaallit Nunaanni inunngorsimasut 60 pct.-iisa meeqqat atuarfiat qaffasinnerpaatut ilinniagarisimavaat, 2020-mi 61 pct.-iusimallutik. Innuttaasullu Kalaallit Nunaata avataani inunngortut 51 pct.-ii meeqqat atuarfiannik qaffasinnerpaamik naammassinnissimapput, 2020-mi 36 pct.-iusimasut.

 

Kalaallit Nunaata avataani inunngortut ilinniagaqarsimassusiisa appariaataat Asiamiunik nunasisunik amerliartuinnartunillu peqquteqarpoq. Innuttaasut Asiami inunngortut amerlasuut ilinniagaqarsimanermut nalunaarsuuteqanngillat.

 

Titartagaq 2. Innuttaasut (16-74-inik ukiullit) meeqqat atuarfianniit qaffasinnerusumik ilinniagaqarsimasut amerlassusaat, inunngorfik malillugu

Nassuiaat: 16-74-inut ukiullit meeqqat atuarfiannik qaffasinnerpaatut ilinniagaqarsimasunut inunngorfik.

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROF).

 

Arnat akornanni ilinniarsimassuseq qaffasinneruvoq

Arnat amerlassusaat eqqarsaatigalugu meeqqat atuarfiannit qaffasinnerusumik ilinniagaqarsimasut amerlanerupput. 2022-mi arnat 45 pct.-ii inuusuttunut ilinniarfinni imaluunniit ilinniaqqiffinni ilinniarsimapput, angutilli akornanni ilinniarsimasut 38 pct.-iusut.

 

Assigiinngissut annerpaaq ilinniaqqissimasut akornanniippoq. 2022-mi arnat 16 pct.-ii ilinniaqqissimasuupput angutit akornanni 9 pct.-iusut. Ukiut qulit kingulliit ingerlanerini arnat akornanni ilinniaqqissimasut qaffannerpaajusimapput. Ilinniagaqaqqissimasut akornanni professionsbacheloritut ilinniagaqarsimasut amerlinerpaallutik.

 

Titartagaq 3. Innuttaasut (16-74-inik ukiullit) meeqqat atuarfianniit qaffasinnerusumik ilinniagaqarsimasut amerlassusaat, suiaassuseq aamma ukioq malillugit

Nassuiaat: Inuusuttunut ilinniakkani ilinniarnertuunngorniarnerit, inuussutissarsiornermik ilinniarnerit aammalu angusanik qaffassaanerit pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROG).

 

40-nit 44-nut ukiullit akornanni meeqqat atuarfiannit qaffasinnerusumik ilinniagaqarsimasut amerlanerupput

2022-mi ilinniagaqarsimasut amerlassusaat 40-44-nik ukiullit tungaannut qaffassimavoq, 57 pct.-iullunilu qaffasinnerpaavoq. Innuttaasut utoqqaanerusut akornanni ilinniagaqarsimassutsip qaffasissusaa appariaqqippoq. Ilinniagaqarsimassutsilli qaffasissusaanut nalunaarsuutit innuttaasunut inuusunnerusunut nalinginnaasumik matussusiinerupput.

 

Titartagaq 4. 2022-mi innuttaasut (16-it 74-illu akornanni ukiullit) qaffasinnerpaatut ilinniakkat naammassisimasaat, ukiut malillugit

Nassuiaat: Inuusuttunut ilinniakkani ilinniarnertuunngorniarnerit, inuussutissarsiornermik ilinniarnerit aammalu angusanik qaffassaanerit pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROE).

 

Sumiiffinni assigiinngitsuni ilinniarsimassuseq

Nuup immikkoortuani ilinniarsimassuseq qaffasinnerpaavoq, tassani innuttaasut 54 pct.-ii meeqqat atuarfianniit qaffasinnersumik ilinniagaqarsimapput, nuna tamakkerlugu agguaqatigiissitsinermi innuttaasut 34 pct.-ii meeqqat atuarfianniit qaffasinnerusumik ilinniagaqarsimasut. Qaqortup aamma Sisimiut immikkoortuanni innuttaasut 44 aamma 41 pct.-ii meeqqat atuarfianniit qaffasinnerusumik ilinniagaqarsimallutik nuna tamakkerlugu agguaqatigiissitsinermit qaffasinnerupput.

 

2022-mi Upernaviup immikkoortuini ilinniarsimassuseq appasinnerpaavoq, tassani innuttaasut 18 pct.-ii meeqqat atuarfianniit qaffasinnerusumik ilinniagaqarsimammata.

 

Titartagaq 5. 2022-mi distriktini innuttaasut (16-it 74-illu akornanni ukiullit) ilinniarsimanerisa qaffasissusaat

Nassuiaat: Inuusuttunut ilinniakkani ilinniarnertuunngorniarnerit, inuussutissarsiornermik ilinniarnerit aammalu angusanik qaffassaanerit pineqarput.

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROG)

 

Eqikkaaneq

 

Tabel 1. Innuttaasut (16-it 74-illu akornanni ukiullit) qaffasinnerpaatut ilinniarsimasaat

	2007	2010	2013	2016	2019	2022
Meeqqat atuarfiat .................	28.468	28.164	27.263	25.785	24.789	25.250
Ilinniarnertuunngorniarneq ...........	1.183	1.387	1.749	2.065	2.240	2.115
Inuussutissarsiornermik ilinniarneq .....	6.384	6.936	7.418	7.930	8.320	8.508
Angusanik qaffassaaneq ............	1.291	1.286	1.298	1.318	1.381	1.476
Ingerlariaqqiffiusumik ilinniarneq naatsoq	851	916	964	1.040	1.170	1.230
Bacheloritut ilinniarneq .............	139	177	227	254	314	316
Professionsbacheloritut ilinniarneq .....	1.958	2.154	2.325	2.457	2.657	2.652
Kandidatitut ilinniarneq .............	782	871	957	1.077	1.209	1.076
Phd. ..........................	20	31	32	53	53	54

Najoqqutaq: Naatsorsueqqissaartarfik – Kisitsisaataasivimmi kisitsisit (https://bank.stat.gl/UDNISCPROD).